［舊媒體一樣大把泡沫股］CBS 股價10蚊升到100蚊，唔批新股對唔住自己，之後跌一半都賺到笑。不過...

［舊媒體一樣大把泡沫股］CBS 股價10蚊升到100蚊，唔批新股對唔住自己，之後跌一半都賺到笑。不過有人槓杆買咪畀人打靶咯。Discovery仲Q好笑，條數根本點計都唔啱

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
告個急先：Ivan已被炒，已成失業人士。未訂嘅記得訂Patreon，積小成多呀。訂咗嘅可以考慮加碼（https://bityl.co/4Y0h）。 一星期至少出返六篇文．月頭訂最抵！月費80
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
1. 應該有唔少人都知道 韓仔基金畀高盛斬倉嘅故事（唔知嘅，呢度：https://bityl.co/6AOz）。但即係，斬倉呢啲嘢，成日都有架啦，本人返工都幫手斬唔少人倉。幸好啲倉普遍都唔太大，但都試過係人踩人插七八九成嘅斬出街（當然唔使我襟掣，甚至都唔係我話事，但呢個「斬倉委員會」都要我畫隻龜嘅）

2. 想講嘅係，斬倉呢啲，成日都有，補唔到孖展，同公司關係又唔係特別好（其實都好少有關係講，除非老細一早特別講明此人斬不得），當然就斬你老母冇朋友。亦因為咁，我都寫過，買樓致富（唔好話發達啦，當第一桶金，一千或幾百萬咁）易，買股難，因為樓你人人做槓杆。股票本身已經難借得多，息又貴一截，最慘係一跌就要你補，兩日（甚至一日）錢唔到就斬。樓冇乜呢啲嘢，你生生性性準時個個月還錢，你負資產銀行都好少call loan

3. 所以我有興趣嘅唔係斬倉，其實知呢個韓仔基金前我已經想寫。咁大家知，主要斬兩類嘢，一類係啲中概股。另外係呢兩隻美股ViacomCBS同埋Discovery．

4. 留意嘅係，之前呢兩堆嘢已經跌落嚟，咁中概股好多人都知，因為咩唔符合審計要求就可以除牌嘅決定。其實絶對係舊嘢，但之前有人估拜登上台可能暫緩，結果都係照去，咁堆中概股都瀉咗幾日啦。

5. 正係因為咁，先再觸發呀韓仔要畀人斬，雪球效應，跌咗一截，高盛不問價射晒佢啲貨出街，咪再跌一截，而反正係韓仔食晒所有損失。講得白啲，佢明顯係走去做槓杆，一跌落嚟咪死呢啲人先咯！唔止，多數殺咗呢啲友，就即時反彈。你睇盤後隻隻都彈返。

6. 但我都係想講CBS同Discovery．原理一樣，之前已經落嚟，斬倉咪再跌多啲。咁，就真係唔係因為中概股事了。

7. CBS同Discovery有乜共通點？「都係媒體股」「都係玩串流」「都係升咗好多」「都係估值好貴」。

8. 話說美股舊年3月23日見底（我永世記得呢度啲友點樣鬧我話我仆街死財演害人叫人買股票），剛剛過咗一年。知唔知呢一年，標普500指數入面升得最多，係邊間公司?　Tesla？「只係升670%」，排第二。升得最勁嘅，正係呢間CBS，差不多800%，11蚊升上差不多100蚊。仲有，Discovery都排十三，18蚊升上80。

9. 我Patreon都有寫過，呢兩隻嘢，莫講話跑贏大市，直頭跑贏理Netflix．今年「舊經濟」跑出，福士都大幅跑贏Tesla，呢兩隻更加係痴線。

10. 故事同福士都差不多，亦同迪士尼一度細過Netflix但之後又追返過Netflix差不多。你識整電動車，人地唔識？你識做串法，人地唔識？

11. 不過，廸士尼都仲還好，CBS同Discovery，真係過晒火位，邊個話舊經濟股唔會有泡沫？舊文，2019年尾，未爆肺炎已經寫過呢啲媒體股，呢啲基本上做內容嘅，除咗迪士尼，全部都似會收檔（https://bityl.co/6APv）

12. 寫「知乎」篇文咪寫過咯，你係上客上得快，但含金量有幾高？到真係要畀正價嗰時，啲友係cut 你定cut Netflix？大家心照。

13. Discovery 就最Q好笑。有乜生意？就係Discovery Channel．我知好睇，但只係你先識去影企鵝？有個價嘅。而內容並冇你想像中咁值錢，NetFlix偷襲成功都唔係靠內容（雖然之後都做好多內容）。公司推Discovery＋，投資者就發晒妏咁。但要達到返原本嘅收入，Discovery＋ 在美國要上7000萬客，你覺得有冇可能？你睇下Netflix玩咗咁多年都未有呢個數。不過唔緊要，睇估值架咩？你啲死廢老。

14. CBS仲正。其實知唔知有乜業務？Paramount派拉蒙影業，CBS電視，以及出版巨頭Simon & Schuster，全部都唔見得有咩咁巴閉，同迪士尼畀都爭兩班。

15. 但CBS嘅管理層真係醒，咪話股價升咗800%嘅。應該做乜呀？梗係批新股cap水啦！仲要85蚊，真係當啲友傻仔，梗係反應麻麻啦，股價唔插就插。係呀可，唔使睇估值呀可？

16. 你可以睇下圖，今個星期一至四，CBS四日就已經跌咗三成幾，Discovery亦差不多。冇架，貴得滯咪雪崩咯，有乜點解。咁然後先壓低埋韓仔基金，再打靶插多一浸。

17. 話說回頭，照計殺咗呢啲友後，股價必彈。但呢兩隻本身都估值極離地。咁睇返堆中概股？但又真係驚會除牌，有排煩。雖然揀一隻我會揀騰訊音樂，似乎搞都未咁快搞佢，啲數亦冇咁流，仲要有外國股東Spotify．最安全嘅，當然係已經在香港第二上市嗰隻啦—即係，百度。但眾所周知（你唔知話你知），百度嘅業務，係遠遠不及騰訊阿里巴巴嘅，所以早年都講BAT，而家人人只講ATMXJ。

18. 係喎，邊有完美呢？一唔係買ASML咯，2019年尾推到而啦，又新高啦。新經濟股股災？你嗰啲新經濟股股災之嘛。

19. 都又賣下廣告。點解我知以上種種？唔知我知，我啲讀者都知。因為我在Patreon寫。而同時間亦都日日睇好多嘢，你咩CBS Discovery呢啲，平日你邊會睇到？我就睇到啦

20. 所以記得支持下Patreon，近來讀者增長極慢，唔知係我寫得差咗（咪又係咁），定大家輸錢冇心機。「但我話你知，正係輸錢你先要訂」，贏錢使乜睇馬經？不過現實就當然係贏錢你唔介意打賞下荷官，輸錢你就叉燒飯都要R啦，冇計。

21. 但，真係的，ASML都又新高啦。不過，都真係好大了，而家買都冇話唔得，但唔會升十倍掛

＝＝＝＝＝＝＝＝＝＝＝＝＝＝
2021比別人知得多。subscribe now。Ivan Patreon，港美市場評點，專題號外，每日一圖，好文推介。每星期6篇，月費80，半年已1400人訂！（https://bityl.co/4Y0h）。 年費仲有85折

---